மட்டக்களப்பெங்கும் வைகாசித்திங்களில்
மண்ணும் மணக்கின்றது - அங்கே
பட்டி தொட்டியெங்கும் கண்ணகி
பாடலால் காதும் குளிர்கின்றது.

பறையொலி முழக்கமும் குழல்நய ஓசையும்
பண்பாடு சொல்கின்றது - அங்கே
நிறைமகள் கண்ணகி கோயில்கள் தோறும்
நிலவொளி தோற்கின்றது.

உருக்கொண்ட காவடி ஓசைகளங்கே
ஊரெல்லாம் ஒலிக்கின்றது -எல்லாத்
தெருக்களும் அங்கே திருவிழாக் காணவே
தவக்கோலம் பூண்கின்றது.

கும்மி குரவையும் கூத்தும் வசந்தனும்
குறையாது நிறைகின்றது - அங்கே
அம்மியின் ஓசையும் எண்ணையின் வாசமும்
அடியோடு ஒழிகின்றது.

பொரித்தலும் வறுத்தலும் சுண்டலும் அங்கே
புதையுண்டு போகின்றது - எங்கும்
சிரித்தலும் சிந்துவும் ஆட்டமும் தானே
சிறப்புடன் வாழ்கின்றது.


கதவு திறத்தலும் கலைகள் படைத்தலும்
காவியம் பாடலுமே - அங்கே
முதலிடம் பெற்றதாய் முக்கியமாகவே
முன்வந்து நிற்கின்றது.

பூசை புனஸ்காரம் புண்ணிய வேலைகள்
பூம்பந்தல் கட்டுதலும் - வெடி
ஓசையும் கோயிலின் வாசலிலே வந்து
ஓரமாய் நிற்கின்றது.

நாடு கடந்தவர் வீடு மறந்தவர்
நாதிகள் மறந்திடினும் - இங்கே
பாடுபட்டேயவர் ஊருக்கு வந்துமே
பாடித் திரிந்திடுவார்